По пауза од повеќе од една година во Скопје се враќа Веселин Вујовиќ и повторно на дуел на Вардар. Овојпат познатиот тренер како дел од екипата на ППД Загреб, но во салата во СРЦ Кале, која утре (20,15 часот) за последен пат ќе биде домаќин на натпревар на машката екипа на Вардар. Од следниот натпревар, актуелниот првак на СЕХА ГСС лигата натпреварите ќе ги игра во Арената "Јане Сандански" која има капацитет од повеќе од 5.000 седишта.

Откако со Вардар ја освои шампионската титула, Вујовиќ замина во Дубаи, а сега повторно е "дома" и ќе биде дел од СЕХА ГСС лигата. Тој со Вардар беше и прв победник на Регионалната лига пред три години, и двапати беше финалист на СЕХА ГСС лигата, повторно со Вардар.

Двете екипи тргнаа успешно во ЕХФ лигата на шампионите, Вардар победи на гостувањето во Целје (27-26), а ППД Загреб направи уште поголемо изненадување со домашниот триумф против германски Кил (27-25). Двете екипи сезонава имаат по еден пораз во СЕХА ГСС лигата.

Тренерот на Вардар, Раул Гонзалез се уште не решил со кој состав ќе игра на мечот од СЕХА ГСС лигата, бидејќи ќе ги почека последните тренинзи и ќе реши кому ќе му ја даде довербата. Извесно е дека Растворцев и Петриќ сигурно ќе бидат на трибините поради повреда.

Во екипата на Загреб ќе ги нема Вуглач и Мандалиниќ, и тие следните седум дена ќе бидат отустни од тренинзите. Во Скопје допатуваа по серијата на три победи по ред, две во регионалната лига и една во ЕХФ лигата на шампионите.

Раул Гонзалез - тренер на Вардар

 "Сигурно дека ова нема да биде лесен натпревар, бидејќи Загреб е квалитетна екипа, а тоа го докажаа со победата против екипата на Кил во Лигата на шампионите. За нас ова е значаен натпревар и сакаме да ја продолжиме победничката серија. Тие сега имаат нов тренер, Веселин Вујовиќ кој што ја промени играта во одбраната и сега играат 5-1. Сепак, ние го совладавме дома Металург, очекувам и сега да славиме затоа што ни требат овие три бода, за полесен пласман на завршниот турнир".

Игор Карачиќ - играч на Вардар

Хрватскиот тим сега е предводен од поранешниот тренер на Вардар Вујовиќ, и сигурно е тоа дека не очекува тежок натпревар. Загреб повторно сака да се врати на врвот во Европа, а тоа го докажа со натпреварот против Кил, кога успеа да го совлада германскиот великан во првото коло од ЛШ. Ние мора да одиграме максимално сконцентрирано на овој меч и да ги избегнеме грешките од мечот против Целје".

Веселин Вујовиќ - тренер на ППД Загреб

Ќе биде ова емотивно гостување. Тука навивачите ме сакаат и верувам ќе има одлична атмосфера. Вардар е клуб кој многу напредна, и ние доаѓаме со размилување за победа. Ако победиме добро, ако победи Вардар ќе му честитаме. Загреб има млада екипа, која треба да знае како да одигра и после една голема победа. Сега Вардар е доста изменета екипа од порано кога јас бев тренер, но го знам менталитетот на играчите. Ова се натпревари во кои се подига формата. Најважно е да се стигне до Ф4 турнирот, а потоа следуваат "вистинските натпревари".

 Илија Брозовиќ - играч на ППД Загреб

Треба да се спушти топката на земја и по оваа голема победа против Кил да се одигра добро и во Скопје. Ќе биде тешко, но мислам дека секого можеме да победиме ако вака играме. Треба да продолжиме така да играме.