Тимур Дибиров: Притисокот од навивачите ни дава мотивација за нови успеси

Имајќи ја лани најдобрата сезона во клупската кариера, актуелниот првак на СЕХА ГСС лигата, Вардар сега влегува во нов циклус, со најдобрите играчи што некогаш играле за "црвено-црните", со два трофеи во витрините, но, и со нови планови. Да се освои она што им беше на дофат, пред се пласман на Ф4 турнирот во ЕХФ Лигата на шампионите, враќање на шампионската титула во домашното првенство, и задржување на приматот на најдобар клуб во Регионалната СЕХА ГСС лига.

Новата клупска икона, рускиот интернационалец Тимур Дибиров исто како и клубот ја имаше можеби најдобрата сезона на клупски план, освојувајќи многу индивидуални признанија. Вардар сега ќе биде фаворит на сите натпревари, сите клубови токму против "црвено-црните" ќе играат крајно мотивирани, па и потешко ќе биде да се победува.

"СЕХА ГСС лигата не е само Вардар, Металург, Татран, Веспрем или Загреб. Има доста квалитетни екипи, мислам дека од сегашниот состав на лигата, дури 6-7 екипи можат да стигнат до Ф4 турнирот. Сите екипи се засилија, направија чекор понапред од лани во однос на квалитет, игра, организација. Со влегувањето на Веспрем, лигата стана уште поквалитетна, и задачата да се победи на натпреварите ќе биде тешка. Не, значи само дека Веспрем е силен. Напротив верувам дека сите екипи ќе го покажат квалитетот. Сега е потешко да се одбрани титулата, и на сите мечеви Вардар ќе биде фавори, не бидејќи е шампион, туку бидејќи има должност, со вакви играчи па победува постојано, вели Дибиров.

Лани Вардар освои два трофеи, во СЕХА ГСС лигата и Купот на Македонија, беше на еден гол до Ф4 во Келн во ЕХФ Лигата на шампионите. Дибиров беше избран за МВП на Ф4 турнирот во Нови Сад, во Ол стар тимот на ЕХФ Лигата на шампионите, втор стрелец во СЕХА ГСС лигата. Колку е тешко да се одбрани она што беше освоено, и да се направи чекор напред до она што беше на дофат, а не се освои?

"Тие победи и награди, и се она што го постигнавме лани го имаме избришано од главата. Во секоја нова сезона почнуваме со нови задачи, и ако гледаш како си играл досега добро, никогаш нема да бидеш подобар. Тренерот секој ден ни кажува да не гледаме назад, туку само напред. Она што се случило вчера да заборавиме. Сакаме побрзо да се рехабилитираме пред навивачите. Ако работиме секој ден добро, резултатите ќе дојдат. Не треба да се форсира, и треба да се гледа што ќе имаме освоено на крај од сезоната, вели Дибиров

Сезонава во Вардар дојдоа неколку нови ракометари, на секоја позиција има квалитетни замени. Новите играчи со себе имаат многу медали, резултати, искуство, Тоа му дава нов квалитет на тимот.

"Сите сме професионалци, и ги знаеме нивните квалитети. Лани Вардар беше како семејство, и на некои натпревари не бевме фаворит, а победивме, бидејќи имавме срце, желба и мотив. Сега добивме и квалитет, имаме доста нови играчи, и работата на подготовките беше тешка, па и во Струга беше тешко зашто немавме работено со топки. Но, знам дека ние кога ќе треба ќе победиме, смета Дибиров

Кога има квалитетна екипа, кога се освојуваат трофеи, постојано им аи притисок. Да се задржи темпото, квалитетот, и да се освои она што досега не било во клупските витрини.

"Има притисок бидејќи сите знаеме дека навивачи очекуваат Ф4, тоа малку не повеќе не стимулира. И сакам да им вратиме со иста мерка, да имаме заеднички ден, каде ќе прославуваме, вели Дибиров

Сите сакаат победи, трофеи, но што се плановите на Вардар за новата сезона.

"Не треба да летаме во облаци. Би било добро да се освои домашната титула, и да се биде во Ф4 на СЕХА ГСС и ЕХФ лигата на шампионите. Тоа сигурни би биле добри резултати за нас, најавува Дибиров.

Македонскиот клуб новата сезона во СЕХА ГСС лигата ја почна со победа на гостински терен кај Војводина, 26-21, а вистинските предизвици допрва претстојат.

"На секој меч ќе играме подобро, зашто подготовките поминаа, сега повеќе работиме на тактички план, повеќе со топка, и ќе бидеме подобри. На турнирите не не интересираа резултатите, а сега со дуелот со Металург треба да почне вистинскиот дел на сезоната, најавува Дибиров.

Дуелот од Регионалната СЕХА ГСС лига меѓу Вардар и Металург е закажан за в сабота во 20,15 часот во салата СРЦ Кале.