По двата настапи на Ф4 турнирот во СЕХА лигата, македонски Металург сезонава не успеа да влезе во Топ-4 екипите што ќе разигруваат за трофејот во регионалното натпреварување. Петтото место, и освоените 28 бода, беа недоволно за амбициите што екипата од Скопје ги имаше пред почетокот на сезоната, иако секогаш најавуваа прв план им е домашната титула и играњето во ЕХФ лигата на шампионите.

Нема да има третиот обид да се борат за титулата. Лани Металург загуби од Вардар уште во полуфиналето на Ф4, а претходно во македонското дерби, но во финалето подобар беше Вардар.

Клучно за ваквиот пласман на Металург во СЕХА лигата се петте порази пролетва во седумте натпревари. Металург победи дома против Борац и Војводина, но непланирано загуби од Нексе и последнопласираниот Партизан, па самите си направија да се најдат во таква ситуација. Триумфот на Мешков во Скопје (26-25) ги урна сите надежи на Металург за пласман на Ф4. Последниот меч со Татран го одиграа со младинска екипа, дуел кој ништо не решаваше.

Тренерот Лино Червар отсекогаш велеше дека СЕХА лигата ја сфаќа како подготовка за мечевите од ЕХФ лигата на шампионите и за поголема минутажа на помладите играчи. Ова правило не секогаш го почитуваше хрватскиот тренер, бидејќи имаше натпревари особено оние во декември кога "бркаше бодови" со полн состав, кога играше со најсилниот тим и бараше шанса да остане во игра за место што ќе води на Ф4 турнирот. Сезонава првпат и тој даде голема поддршка на проектот СЕХА лига.

Се тргна лошо по повредата на Наумче Мојсовски во декември на последниот меч со Вардар. Тимот ја загуби ударната игра, личноста што многупати беше џокер во натпреварите, кој знаеше да повлече кога е најпотребно. Се покажа дека без него Металург не е истиот. Исто како што шансите за триумф се различни и кога голманот Дарко Станиќ е во форма. А сезоната неговата форма беше далеку од минатогодишната кога беше во најдобрата седморка во ЕХФ лигата на шампионите. Со процент на реализација на одбранети удари од 35 отсто (235/676) голманите немаа придонес каков што се очекуваше. Иако тој процент е највисок во лигата, исто како и бројот на примени голови (24,5), проблем беше одбраната, најсилното досегашно оружје на Металург. Загубена беше цврстината, па противниците лесно наоѓаа начин да дојдат до гол.

Повредите постојано го следеа тимот, па имаше натпревари кога на трибините се менуваа клучните играчи, како Филип Миркуловски, Павел Атман, Ренато Вугринец. Ретко имаше натпревар во кој сите ракометари му беа на располагање на тренерот. Токму поради ваквите проблеми тимот мораше да купува засилувања. Прво беше донесен средниот бек Лука Циндриќ, а потоа и Вуко Борозан. По еден месец играње ослободен беше пивотменот Петар Топиќ, а голманот Петар Ангелов доби дозвола да замине бидејќи конкуренцијата во Автокоманда беше голема, и малкумина добиваа вистинска минутажа.

Раните од СЕХА лига може да се залечат само со титула во домашното првенство, каде главен фаворит е Вардар, и со настапот во осминафиналето на Лигата на шампионите. Дуелот со Килдинг ќе биде крајно неизвесен, и скопјани веруваат дека со овие натпревари може да се заборави лошата сезона во СЕХА лигата.

http://www.seha-liga.com/stats