-->

По завршувањето на СП во Франција, сите екипи во СЕХА Газпром лигата се враќаат на секојдневните обврски, вклучувајќи ги и Вардар и Нексе. Двата тима во четврток ќе го имаат првиот натпревар во СЕХА Газпром лигата во 2017 година. За Вардар ова е последен меч пред домашната публика во регуларниот дел од сезоната.

 

До крајот на регуларниот дел од сезоната Вардар треба да одигра уште три натпревари. За освојување на првото место на табелата и влегување во Ф4 турнирот од тоа место на Вардар му требаат две победи од трите натпревари.

Екипата веќе долго се подготвува за пролетниот дел од сезоната. Единствено неизвесен е голманот Страхиња Милиќ кој цел месец беше на рехабилитација поради повреда на рамото. На последниот натпревар со Нексе, одигран во гости во октомври минатата година, Вардар славеше со 30-27.

 

Раул Гонзалез, тренер на Вардар:

По долга пауза, ги почнуваме натпреварите од СЕХА лигата. Очекувам многу добар натпревар, многу интензивен. Ние сакаме да бидеме победници на лигата, а пред нас се три натпревари и треба да ги победиме на два ако го сакаме прво место. Ќе играме против Нексе, кои сега имаат нов тренер, и во натпреварот против Веспрем победија на гости. Тие играат многу добар ракомет. Од вчера почна да тренира цела екипа, освен Циндриќ, кој има пауза до утре. Но, потоа ќе ги имаме сите играчи и ќе одлучиме кој ќе игра. Немавме многу тренинзи во изминатиот период со целата екипа. Заедно сме од понеделникот, но очекувам да играме добро и треба да го искористиме времето и да се уиграме. Првиот тренинг може не беше како ние што сакаме да биде, но беше добар тренинг.

 

Стојанче Стоилов, капитен на Вардар:

Ова ќе биде прв натпревар по паузата и екипата долго време не била заедно, но тоа нема да биде проблем и мислам дека не треба тоа ништо да менува. Ние сме фаворитот во натпреварот, а играме и дома против Нексе. Тие се одлична екипа и ни правеле проблеми во минатото, но, играме дома. Сакаме да ја почнеме втората полусезона со победа и се надевам дека ќе го оствариме тоа.

Хрвоје Хорват, тренер на Нексе:

Ако ја видите позицијата на табелата таа ќе ви покаже колку тежок натпревар не очекува. Многу играчи на Вардар беа на СП во Франција. Па, тие веројатно и се уморни и не се подготвени за клупски натпревари. Ние ќе играме без Томислам Нуиќ кој има повредена усна, и без Јосип Божиќ Павлетиќ. Од мојот тим очекувам да ја искористат шансата ако им се укаже.

 

Саша Баришиќ-Јаман, играч на Нексе:

Вообичаено ние играме подобро во Скопје отколку во Нашице. Тие се одличен тим со многу играчи што настапија на СП. Мораме да дадеме се од себе и да покажеме добар ракомет.